我的美麗佚事

前兩日睇報紙，有個議員叫某富豪與其捐錢不如唔好賺到盡。睇完我即刻火滾，呢啲咩邏輯黎架？人哋上市公司做生意要對股東負責架，你叫人唔好賺到盡？冇野呀？

係呀，佢係起發水樓呀，重要用啲料勁廢添，呢樣野係香港人都知架啦，慘得過又有人肯買佢啲發水樓啵！講真，呢個係自由市場，冇人搵支槍對住邊個個頭逼人買野，小業主既然明知呢位富豪鍾意起發水樓，仲要中個頭埋去，又唔肯用個放大鏡刨下本樓書，比人搵笨惟有怪自己蠢啦。大嗱嗱幾百萬你估真係買棵菜呀？

我都唔明呢個白痴議員次次出黎講親都係廢話，點解仲可以不停連任？所以話「群衆係愚昧既」呢句説話真係至理名言！頂，你叫人唔好賺到盡時，不如下屆選舉讓翻一萬幾千張選票比你既對手呀笨。

講真，大家都係潮州人，我非常欣賞呢位富豪。起碼佢唔會好似咩股神咁下下出黎比山埃貼士人地。至於應唔應該賺到盡，我覺得絕對應該啦。又唔係奸淫虜掠或者打家劫舍，點解要有錢唔賺？

哇，要用普通話拼音打咁多口語真係好辛苦！